Þorsteinn V Einarsson fyrrum knattspyrnumaður og baráttumaður fyrir jafnrétti segir að ekki sé hægt að stimpla alla knattspyrnumenn fávita. Þetta kemur fram í viðtali við hann í Fréttablaðinu í dag.

Þorsteinn sem heldur utan Karlmennskuna, um er að ræða reikninga á samfélagsmiðlum, hlaðvarp og sjónvarpsþætti sem Þorsteinn heldur úti.

Knattspyrnuhreyfingin er í vanda stödd, ásakanir um gróf ofbeldisbrot ganga nú fjöllum hærra og hylming hreyfingarinnar í heild. Sökum þess hefur stjórn KSÍ sagt af sér og sömuleiðis Guðni Bergsson formaður sambandsins.

Mikið hefur verið kallað eftir því að knattspyrnumenn tjái sig um þessi málefni en lítið hefur borið á því, hingað til. „Ég held í alvörunni að knattspyrnumenn viti ekki hvað þeir eiga að segja, hvernig þeir eigi að bregðast við eða hvað þeir geta gert. Það er ákveðinn vanmáttur sem er nærður af óttanum við að missa sína félagslega stöðu, völd og virðingu meðal félaga sinna í klefanum,“ sagði Þorsteinn í viðtali við Fréttablaðið.

Þorsteinn segir að ekki sé vinsælt af knattspyrnumönnum að heyra talað um svona mál í búningsklefanum. „Meðal annars vegna þess að það er ekkert vinsælt né litið upp til þeirra sem eru að spá í svona málum. Það að vera femínisti, það er ekki alveg það vinsælasta í fótboltanum eða að vera skipta sér af jafnréttismálum eða taka stöðu með óþægilegum málefnum,“ segir Þorsteinn.

„Ég held að við séum að vanmeta þessi litlu atriði. Hvað gerist þegar leikmaður sem tjáir sig mætir á æfingu. Óttinn við viðbrögð liðsfélaganna og þjálfara, ef viðkomandi tjáir sig. Við erum að vanmeta hvað þetta viðheldur þögguninni og kyrrstöðunni að menn tjái sig ekki.

Þorsteinn ítrekar hins vegar að staðan sé ekki þannig að allir knattspyrnumenn séu fávitar. „En auðvitað er það þannig að það er fullt af flottum strákum í fótbolta sem eru að gera fullt af góðum hlutum. Þeir hafa aldrei beitt ofbeldi og ekki mismunað einum né neinum. Það er ekki allir fótboltamenn fávitar svo ég segi hið augljósa. En allir geta borið ábyrgð á nauðsynlegu breytingunum.“