Stjórn KSÍ hefur öll sagt af sér og samþykkti á fundi sínum þann 30. ágúst að boða með fjögurra vikna fyrirvara til aukaþings í samræmi við 13. grein laga KSÍ.
„Stjórn, varafulltrúar og landshlutafulltrúar hafa ákveðið að segja af sér og munu skila umboði sínu eigi síðar en þegar til aukaþingsins kemur,“ segir í yfirlýsingu í kvöld.
Mikill þrýstingur hefur verið á að stjórnin segir af sér eftir helgina. Guðni Bergsson sagði upp störfum sem formaður KSÍ í ljósi þeirra mála sem verið hafa til umræðu. Maraþonfundir fóru fram í Laugardalnum um helgina þar sem stjórn sambandsins fundaði, á þeim loknum steig Guðni til hliðar. Allt tengist þetta málum um ásakanir á hendur landsliðsmanna um kynferðislegt ofbeldi.
Allt starfsfólk sambandsins var boðað til fundar eftir að Guðni tók ákvörðun um að stíga til hliðar. Íslenska karlalandsliðið er á leið í verkefni en liðið á þrjá heimaleiki á næstu dögum, málið mun án nokkurs vafa fá mikla athygli í undirbúningi fyrir leikina.
Áskoranir á stjórnina og Klöru Bjartmarz um að segja af sér hafa gengið í dag. „Þessi niðurstaða er í samræmi við áskoranir Íslensks Toppfótbolta, óskir fulltrúa félaga sem sent hafa áskorun um aukaþing og þrýsting frá samfélaginu,“ segir í yfirlýsingu.
Ekki kemur fram hvort Klara Bjartmarz framkvæmdarstjóri sambandsins haldi starfi sínu eða áfram að láti af störfum.
Stjórnin vill af þessu tilefni koma eftirfarandi á framfæri:
Vinnu faghóps um endurskoðun viðbragða við kynferðisbrotum og ofbeldi innan hreyfingarinnar og hvernig staðið var og verður að stuðningi við þolendur verður áfram í forgangi.
Stjórn, varafulltrúar og landshlutafulltrúar hafa ákveðið að segja af sér og munu skila umboði sínu eigi síðar en þegar til aukaþingsins kemur.
Þessi niðurstaða er í samræmi við áskoranir Íslensks Toppfótbolta, óskir fulltrúa félaga sem sent hafa áskorun um aukaþing og þrýsting frá samfélaginu.
Stjórnin hefur fundað með forseta ÍSÍ um framgang málsins og um það hvernig best verður haldið um starfsemi KSÍ fram að aukaþingi svo starfsemin haldist órofin.
Fundað verður með fulltrúum UEFA og FIFA um stöðu málsins og fyrirhuguð stjórnarskipti þannig að ekki þurfi að koma til afskipta knattspyrnusambandanna að starfsemi sambandsins.
Ásgeir Ásgeirsson hefur tilkynnt að hann segi sig hér með frá trúnaðarstörfum fyrir KSÍ.
Stjórnin færir starfsfólki KSÍ og sjálfboðaliðum í hreyfingunni bestu kveðjur og þakkir fyrir frábært samstarf og hvetur það til að vinna áfram af trúmennsku og dugnaði í þágu íslenskrar knattspyrnu.
Meira á leiðinni…
