Stjórn Knattspyrnusambands Íslands (KSÍ) fundaði í hádeginu í dag og mun funda aftur í gegnum fjarfundabúnað klukkan fimm. Þetta fékk Vísir staðfest hjá Gísla Gíslasyni, varaformanni KSÍ. Gísli vildi ekkert gefa upp um efni fundarins og vildi ekkert segja um hvort yfirlýsingar mætti vænta að fundi loknum.

Margir hafa í dag kallað eftir því að Klara Bjartmarz, framkvæmdastjóri KSÍ, sem og stjórnin öll segi af sér vegna hneykslis í tengslum við viðbrögð sambandsins við ásökunum um ofbeldi á hendur landsliðsmönnum.

Samfélagsmiðlar hafa einnig logað og er stjórn KSÍ þar borin þungum sökum og sögð rúin öllu trausti.

Samtök félaga í efri deildum KSÍ hafa lýst yfir vantrausti á stjórninni og níu félög í neðri deildum hafa krafist þess að boðað veðri til aukaþings.

Jafnframt hefur verið boðað til mótmæla fyrir utan landsliðsleikinn gegn Rúmeníu á Laugardalsvelli á fimmtudag.