Ole Gunnar Solskjaer, þjálfari Manchester United, segist ekki geta neytt leikmenn til að taka seinni bóluefnaskammtinn, en hvetur jafnframt leikmenn til að gera það.
England aflétti öllum samkomubönnum í sumar en Covid hefur enn áhrif á gang mála í ensku úrvalsdeildinni. Fjórir leikmenn Arsenal verða til að mynda ekki með gegn Chelsea um helgina vegna gruns um smit, og Christian Pulisic, leikmaður þeirra síðarnefndu greindist smitaður í vikunni.
Solskjaer hefur áður sagt að sumir leikmenn United væru óvissir um hvort þeir ættu að fara í sprautu en ekki allir leikmennirnir hafa fengið tvo skammta.
„Nei, það hafa ekki allir fengið tvo skammta,“ sagði hann í viðtali. „Ég er fullbólusettur, orðum það þannig. Ég hvet strákana til að fara í sprautu en við getum ekki neytt neinn til þess. Við viljum að allir geri það, en það er undir þeim komið, og það stendur til boða að fá sprautu.“
Æfingarleik Man United og Preston North End í sumar var aflýst vegna gruns um smit í herbúðum United. Níu leikmenn greindust smitaðir en seinna kom í ljós að ekki var um smit að ræða og Solskjaer kenndi gölluðu prófi um niðurstöðurnar.
