Þeir Hörður Snævar Jónsson og Hrafnkell Freyr Ágústsson ræddu um það í markaþætti Lengjudeildarinnar á mánudag hvort það gæti orðið fínt fyrir Þrótt Reykjavík að fara niður í 2.deild í smá tíma til endurmóta liðið sitt.

Þróttur hefur verið í tíunda sæti Lengjudeildarinnar tvö ár í röð. Í bæði skiptin hefur liðið bjargað sér frá falli með naumindum.

Í ár er svipaða sögu að segja af Þrótturum. Liðið er í ellefta sæti, 5 stigum frá öruggu sæti, þegar mótið er rúmlega hálfnað.

,,Þeir eru með gott yngri flokka starf og eru farnir að koma yngri leikmönnum inn. Gæti það kannski bara verið lán í óláni að fara niður þar sem allir þessir ungu menn fara í eitt sumar í 22 leiki? Reynsla, koma aftur upp kannski tilbúnir í þessa 1. deild,“ sagði Hörður í þættinum.

Hrafnkell minntist þá að það að það hafi áður reynst liðum vel að fara niður um deild til að stilla strengi sína betur.

,,Algjörlega. Það getur líka bara verið jákvætt. Það hefur oft sannað sig að það sé jákvætt fyrir mörg lið. Við getum tekið Fylki sem dæmi fyrir nokkrum árum, þegar þeir féllu úr úrvalsdeildinni.“

,,Við sáum HK fara niður í 2.deild einu sinni og bara finna sín gildi og komast aftur upp í efstu deild,“ bætti Hörður við.

Hrafnkell telur að það að fara niður um deild gæti komið sér vel þegar kemur að því að sjá hvaða leikmenn eru tilbúnir fyrir átökin næstu árin og hverjir ekki.

,,Þú getur strúktúrerað starfið aftur og fundið hvaða strákar eru tilbúnir í þetta. Bætt ofan á það einhvern veginn. Svo ég myndi segja að það gæti bara orðið mjög fínt fyrir þá í staðinn fyrir að standa alltaf í þessu basli.“

Umræðuna um Þrótt, sem og markaþátt Lengjudeildarinnar í heild sinni, má sjá hér fyrir neðan.