Ronald Koeman stjóri Barcelona er ósáttur við leikjaálagið á hinum 18 ára gamla Pedri. Pedri lék nánast alla leikina með Barcelona á síðasta tímabili og var frábær með Spáni á EM í sumar þar sem liðið komst í undanúrslit en féll úr leik í vítaspyrnukeppni. Pedri er staddur í Tókýó um þessar mundir með spænska landsliðinu þar sem það undirbýr keppni á Sumarólympíuleikunum. Ef Spánn kemst í úrslit gæti Pedri endað á því að leika 72 leiki á einu keppnistímabili.

Margir vilja meina að þetta séu of margir leikir fyrir hinn unga Pedri, sérstaklega í ljósi þess að hann mun mæta aftur til Barcelona fáeinum dögum áður en Spænska deildin fer af stað. Ronald Koeman hrósaði Pedri í hástert en var sömuleiðis ósáttur við leikjaálagið á ungstirninu.

„Pedri var stórkostlegur á EM. Hann er aðeins 18 ára gamall en sýndi mikinn þroska í leik sínum,“ sagði hann í viðtali við Marca.

„Hann er alltaf að bæta sig, og hann er hógvær og afslappaður drengur. Hann lifir fyrir fótbolta. Hann er gott dæmi um hvernig maður á að vera sem ungur leikmaður í Barcelona.“

Koeman bætti við: „Þetta er synd. Við höfum fulla trú á honum, hann hefur engar áhyggjur en það er búist við miklu af honum á næstu leiktíð. Það er mikilvægt fyrir okkur í grunninn að ungir leikmenn finni að þeir séu á réttum stað til að fá tækifæri til að sanna sig.

Pedri hefur spilað mikið. Við ættum að gefa honum eins mikla hvíld og hann þarf á að halda í sumar. Eins og Guardiola sagði, það er of mikið að leika á tveimur stórmótum á einu sumri, en við getum ekkert að því gert.“