Darren Ambrose, fyrrverandi leikmaður Crystal Palace segir að Harry Kane muni eyðileggja orðspor sitt hjá Tottenham ef hann reynir að knýja fram sölu frá klúbbnum.

Ambrose er sannfærður um að fyrirliði enska landsliðsins sé ekki týpan til að neita að mæta á æfingar með liðinu til að þvinga sölu.

Tottenham höfnuðu 100 milljón punda boði Man City í leikmanninn í síðasta mánuði. Spurs vilja ekki selja framherjann sem á þrjú ár eftir af samning sínum við félagið. Ambrose er harður á því að Kane eigi að virða samninginn og ósk Tottenham um að halda í hann.

„Þú ættir alltaf að mæta. Þú ert á samningi,“ sagði hann í samtali við talkSPORT.

„Munnlegur samningur hefur ekkert að segja. Nákvæmlega ekki neitt – sérstaklega ekki ef að Daniel Levy er eins og kunnugt er, hann er alræmdur fyrir að vera harður í horn að taka. Hann mun hafa sagt hvað sem er til að fá Kane til að skrifa undir samninginn í upphafi.“

Ambrose segir að Kane gæti eyðilagt orðspor sitt hjá félaginu ef hann vanvirðir klúbbinn.

„Hann er aðalmaðurinn í liðinu, og hylltur af stuðningsmönnunum. Ég held hann eigi eftir að eyðileggja orðspor sitt og stöðu hjá félaginu ef hann lætur verða af þessu. Hann er líka fyrirliði enska landsliðsins. Ég trúi ekki að hann muni neita að mæta. Ég þekki hann ekki persónulega, en hann virkar eins og topp maður. Ef hann neitar að mæta, og Daniel Levy fær ekki gott boð eða boðið sem hann vill fá í hann, gæti hann einfaldlega sagt honum að vera heima.“