ÍA tók á móti Val í 13. umferð Pepsi-Max deildar karla í dag. Þar höfðu Skagamenn betur og var Heimir Guðjónsson vægast sagt ósáttur við leik sinna manna. Hann hafði þetta að segja við Stöð 2 Sport eftir leik:

„Ég óska Skagamönnum til hamingju með sigurinn. Þeir voru miklu betri en við og þetta var vel uppsettur leikur hjá Jóa Kalla. Við höfðum engan áhuga á því að koma hérna og spila fótbolta og hvað þá að berjast,“ sagði Heimir við Stöð 2 Sport eftir leik.

„Ég þarf að finna út úr því afhverju. Það vita það allir að ef þú ert ekki með grunnatriðin á hreinu í fótbolta þá lendirðu í veseni og við vorum ekki með þau á hreinu og vorum aldrei að klára varnarleikinn sem lið.“

„Menn voru alltaf að hugsa um að komast í sókn og sóknarlega var þetta bara eitthvað tiki taka smáspil og 5 metra sendingar og við áttum bara ekkert skilið út úr þessum leik. Kaj Leo og Sverrir voru þeir einu með lífsmarki í Valsliðinu í dag.“

„Við urðum okkur sjálfum og klúbbnum til skammar í dag.“

Valsliðið spilaði Evrópuleik í vikunni en Heimir telur að það hefði ekki átt að hafa áhrif.

„Evrópuleikurinn var á þriðjudag, það er laugardagur í dag, það er nógur tími til að hvíla sig. Við vorum aldrei klárir í þennan leik og trítuðum þennan leik bara eins og æfingaleik á undirbúningstímabilinu.“

„Við förum yfir þetta í vikunni og reynum að laga þetta. Þegar hugarfarið er ekki gott þá spilaru engan fótbolta og það hefur ekkert breyst frá því að við vorum að spila,“ sagði Heimir að lokum við Stöð 2 Sport eftir leik.