Wayne Bridge, fyrrum enskur landsliðsmaður og leikmaður Manchester City, viðurkenndi að það hafi verið erfitt að takast á við tap Englendinga gegn Ítölum í úrslitaleik EM þar sem hann hatar Roberto Mancini.

Bridge fór til Manchester City árið 2009 frá Chelsea og tók Mancini við aðeins nokkrum mánuðum síðar. Bridge var fljótt sendur á bekkinn og fór svo á lán til ýmissa liða þar til hann samdi við Reading árið 2013. Honum fannst erfitt að fylgjast með Mancini fagna árangri Ítala á mótinu þar sem þeim kemur ekki vel saman.

„Þetta særði mig þar sem ég hata Mancini. Allir vita að ég þoli hann ekki. Ég get ekki sagt að hann sé versti þjálfari sem ég hef haft, en tæknilega er hann ekki svo góður,“ sagði Bridge við The Big Stage.

„Fjölskylda mín hélt ekki bara með Englandi, heldur voru þau að vonast til þess að Mancini myndi tapa sem særði okkur enn meira. Ég tengdist aldrei við hann sem stjóra.“

„Stuðningsmenn City elska hann fyrir að hafa unnið deildina, en ef þú lítur á leikmennina og liðið sem hann hafði þá var það ástæðan fyrir sigrinum, ekki hann sem stjóri.“