Joe Gomex opnaði sig á dögunum um erfið meiðsli sem hann varð fyrir á síðustu leiktíð og hvernig hann og Virgil van Dijk hjálpuðust að við að takast á við langa fjarveru frá fótboltanum.

Gomez meiddist alvarlega á hné í landsleikjahléi með Englandi í nóvember í fyrra og var ekki meira með á leiktíðinni. Van Dijk sleit krossband stuttu áður í leik gegn Everton. Þetta þýddi að Liverpool var án miðvarðaparsins stóran hluta leiktíðarinnar.

„Þetta var svakalegt. Það voru svo margar stundir í byrjun þegar við sátum báðir heima á sófanum og gátum ekki hreyft okkur. Þá töluðum við mikið saman á FaceTime,“ sagði Gomez við vefsíðu Liverpool.

„Hann skildi hvað ég var að ganga í gegnum og það var gott að pústa þegar maður er reiður. Það skipti miklu máli. Við erum þakklátir fyrir hvorn annan. Þetta voru án efa erfiðar aðstæður en stuðningurinn hjálpaði.“

Leikmennirnir eru nú báðir mættir á undirbúningstímabil Liverpool í Austurríki og hafði Jurgen Klopp orð á því á blaðamannafundi að þeir litu vel út.