Samkvæmt frétt Daily Mail eru enskir landsliðsmenn í áfalli yfir þeirri ákvörðun Gareth Southgate, landsliðsþjálfara, að senda hinn 19 ára gamla Bukayo Saka á vítapunktinn til að taka fimmta víti liðsins í vítaspyrnukeppni úrslitaleiks Evrópumótsins gegn Ítalíu.

England tapaði leiknum í víaspyrnukeppninni. Þeir Marcus Rashford, Jadon Sancho og Saka klikkuðu allir á sínum spyrnum.

Pressan á hinum unga Saka þegar hann steig á punktinn var svakaleg. Hann þurfti að skora til að halda Englendingum inni í leiknum. Allt kom fyrir ekki. Leikmenn enska liðsins eru sagðir steinhissa á þessari ákvörðun Southgate, enda voru reynslumeiri leikmenn til taks.

Þannig er þó mál með vexti að England hefur æft vítaspyrnur reglulega síðan í haust. Tölfræðin af æfingum var svo einfaldlega notuð til að stilla upp vítaskyttum í úrslitaleiknum. Eftir þeirri tölfræði var Saka settur á punktinn á undan mönnum eins og Jack Grealish eða Raheem Sterling.

Hvort að það sé rétt að velja vítaskyttur með þessum hætti er svo annað mál, enda erfitt að bera það saman að taka víti á æfingum og í úrslitaleik á stórmóti.