Guðni Th. Jóhannesson, forseti Íslands, var gestur á Stöð 2 Sport eftir úrslitaleik Evrópumótsins í gær.

Eins og flestir vita þá mættust England og Ítalía í úrslitaleik EM í gærkvöldi. Luke Shaw kom þeim ensku yfir strax á 2. mínútu en Leonardo Bonucci jafnaði leikinn um miðjan seinni hálfleik.

Ekki var hægt að skera úr um sigurvegara í venjulegum leiktíma eða framlengingu. Ítalía vann svo í vítaspyrnukeppni.

Þeir Marcus Rashford, Jadon Sancho og Bukayo Saka klikkuðu á spyrnum fyrir England. Sancho er 21 árs og Saka aðeins 19 ára. Gareth Southgate, landsliðsþjálfari Englands, hefur fengið töluverða gagnrýni fyrir að velja svo reynslulitla menn í það risastóra verkefni sem það er að taka víti í úrslitaleik EM.

Guðni er ánægður með að það sé ekki aðeins einn leikmaður sem þurfi að taka ábyrgð á tapi liðsins.

,,Það er kannski ágætt fyrir þessa þrjá ungu drengi að deila þessum byrðum. Þetta er sameiginlegt skipbrot. Breska pressan fer ekki að beina spjótum sínum að einhverjum einum. Þeir eru þarna þrír og svo þjálfarinn sem mun fá sinn skerf af gagnrýni fyrir þessa djörfu ákvörðun.“