Ítalía er Evrópumeistari eftir sigur í úrslitaleik gegn Englandi. Leikurinn fór alla leið í vítaspyrnukeppni.

England komst yfir strax á 2. mínútu leiksins. Þá skoraði vinstri vængbakvörðurinn Luke Shaw eftir sendingu frá hinum vængbakverðinum, Kieran Trippier. Skot Shaw var fast og á nærhornið. Gianluigi Donnarumma í marki Ítalíu átti enga möguleika.

Næstu mínútur spiluðust nokkuð vel fyrir Englendinga, vegna forystunnar. Ítalir áttu í vandræðum með að finna glufur á vörn þeirra og heimamenn stýrðu leiknum.

Federico Chiesa komst næst því að jafna fyrir Ítali þegar um tíu mínútur lifðu fyrri hálfleiks. Þá átti hann gott hlaup upp völlinn sem endaði með skoti rétt framhjá marki Englendinga. Skotið var fast og hefði Jordan Pickford, markvörður Englendinga, ekki átt möguleika á að verja hefði boltinn verið nokkrum sentimetrum til vinstri.

Staðan í hálfleik var 1-0 fyrir England.

Fyrsti stundarfjórðungur seinni hálfleiks var rólegur, ekkert um góð færi.

Eftir það sóttu Ítalir þó smám saman í sig veðrið. Fyrst kom Chiesa sér í gott færi eftir rúman klukkutíma leik. Pickford varði þó vel frá honum.

Á 67. mínútu kom svo jöfnunarmarkið. Lorenzo Imsigne tók þá hornspyrnu sem Marco Verratti skallaði í átt að marki. Pickford varði frá honum en Leonardo Bonucci fylgdi á eftir og kom boltanum í netið.

Ítalir gátu komust yfir stuttu síðar þegar Verratti átti háa sendingu inn á varamanninn Domenico Berardi. Sá síðarnefndi náði ekki alveg nægilega góðu skoti og setti boltann yfir.

Hvorugu liðinu tókst að finna sigurmark í venjulegum leiktíma. Því var farið í framlengingu.

Hvorugt liðið gerði sig mjög líklegt til að skora í framlengingunni þó svo að Englendingar hafi átt kafla í henni þar sem þeir voru líflegir. Áfram var jafnt og því var gripið til vítaspyrnukeppni.

Nokkrar vítaspyrnur fóru forgörðum í henni. Andrea Belotti og Jorginho klúðruðu fyrir Ítali en það kom ekki að sök því Marcus Rashford, Jadon Sancho og Bukayo Saka misnotuðu allir sínar spyrnur.

Við óskum Ítölum til hamingju!