Harry Kane verður áfram hjá Tottenham ef marka má fréttir Daily Mail. Nuno Espirito Santo var staðfestur sem nýr stjóri Tottenham í gær eftir mikla leit félagsins að stjóra eftir að Mourinho var rekinn í apríl.

Þegar samningaviðræður Nuno við félagið áttu sér stað þá fékk hann þær upplýsingar að Harry Kane myndi vera áfram hjá félaginu og ætti hann að undirbúa sig þannig að stjórstjarnan yrði með og ætlar Nuno að byggja liðið í kringum hann. Daniel Levy er sagður vera ákveðinn í því að Harry Kane sé ekki til sölu.

Harry Kane er þó sagður vilja yfirgefa félagið í sumar í von um að fara að vinna titla en það hefur gengið illa með Tottenham. Hann á ennþá þrjú ár eftir af samningi hjá Tottenham.

Sportsmail sagði frá því í síðasta mánuði að Manchester City hefði boðið 100 milljónir punda í leikmanninn. Levy tók það ekki í mál en hann metur leikmanninn á að minnsta kosti 150 milljónir punda. Það er því ljóst að ef Levy á að breyta um skoðun þá þarf City að bæta tilboðið töluvert.