Aron Einar Gunnarsson fyrirliði Íslands var gestur hjá Stöð2 Sport í gær þar sem hann fór yfir Evrópumótið í knattspyrnu. Aron er í sumarfríi á Íslandi.

David Beckham var í stúkunni þegar England vann Þýskaland í gær og vakti eins og oft áður, mikla athygli. Beckham er 46 ára gamall en hann eldist vel. „Ég verð samt að grípa inn í sem eina konan í þessu setti. Beckham, hann eldist vel,“ sagði Helena Ólafsdóttir á Stöð2 Sport einn af stjórnendum þáttarins um útlitið á Beckham.

Aron Einar greip þá orðið og sagði frá orðrómi sem hann hefur heyrt um Beckham og hans glæsilega útlit.

„Ég er búinn að heyra – við erum fjórir sköllóttir hérna inni – að hann er búinn að fara í tvær hárígræðslur. Vissuð þið af því?“,“ sagði Aron Einar en fyrirliðinn rakaði af sér hárið fyrir nokkrum árum þegar það fór að þynnast.

Aron Einar lagði þá til að mannskapurinn myndi setja sig í samband við Björgólf Thor Björgólfsson, einn besta vin Beckham.
„Spurning um að heyra í Bjögga Thor, fá contact,“ sagði Aron Einar um málið.

Guðmundur Benediktsson stjórnandi þáttarins ætlar í málið. „Það er það næsta sem við gerum þegar þessi þætti lýkur, hringja í Bjögga,“ sagði Gummi Ben á Stöð2 Sport í gær.