Sveinn Aron Guðjohnsen landsliðsmaður í knattspyrnu gæti verið á heimleið. Sagt var frá því í hlaðvarpsþættinum Dr. Football í dag að Sveinn gæti verið að yfirgefa Spezia á Ítalíu.

Sveinn Aron var á láni hjá OB í Danmörku á liðnu tímabili en fékk miklu færri tækifæri en búist var við. Í Dr. Football var því haldið fram að Stjarnan væri að reyna að semja við Svein.

Sveinn Aron er 23 ára gamall en hann yfirgaf Breiðablik sumarið 2018 og gekk í raðir Spezia.

„Sveinn Aron ku vera nálægt því að semja við Stjörnuna,“ sagði Kristján Óli Sigurðsson en Sveinn Aron spilaði sinn fyrsta A-landsleik í mars.

Hjörvar Hafliðason segir að Sveinn Aron þurfi að fara að spila leiki. „Ég vona að hann geri samning sem aldrei hefur verið gerður á Íslandi, að hann spili í 90 mínútur í hverjum leik. Það er það sem minn maður þarf, hann þarf að spila leiki.“

Sveinn Aron er sonur Eiðs Smára Guðjohnsen sem er að margra mati besti knattspyrnumaður í sögu Íslands.