Roger Schmidt, stjóri PSV í Hollandi, hefur staðfest að Donyell Malen sé á förum frá félaginu.

Þessi 22 ára gamli sóknarmaður gerði 27 mörk fyrir PSV í efstu deildinni í Hollandi á síðustu leiktíð. Þá var hann hluti af landsliðshópi Hollendinga á Evrópumótinu sem nú stendur yfir. Liðið féll úr leik fyrr í dag eftir tap gegn Tékkum.

Hann hefur verið sterklega orðaður við bæði Liverpool og Dortmund. Eitt er víst, hann verður ekki mikið lengur hjá PSV.

,,Svona er fótboltinn, sérstaklega hjá PSV, við missum einn eða tvo góða leikmenn á hverju ári,“ sagði Schmidt eftir að hafa staðfest það að Malen væri á förum.

Jurgen Klopp, stjóri Liverpool, mun væntanlega reyna að styrkja lið sitt sóknarlega í sumar. Divock Origi og Xherdan Shaqiri eru á förum. Þá þarf menn til að veita þeim Mohamed Salah, Roberto Firmino og Sadio Mane samkeppni. Malen gæti verið lausn.

Malen lék með yngri liðum Arsenal áður en hann fór til PSV. Hann lék þó aldrei fyrir aðalliðið.