Brottrekstur Loga Ólafssonar frá FH hefur mikið verið í umræðunni síðustu vikuna. Tómas Þór Þórðarson sagði í útvarpsþættinum Fótbolti.net í gær að Logi hefði ekki getað bjargað öllu því sem illa hefur farið hjá fimleikafélaginu.

Loga var sagt upp störfum hjá FH síðasta mánudag eftir slæmt tap gegn Breiðabliki daginn áður. Hann skildi liðið eftir í sjötta sæti deildarinnar með 11 stig eftir níu leiki.

Margt hefur vantað upp á í leik FH á tímabilinu. Tómas Þór gagnrýndi sérstaklega frammistöðu nokkurra leikmanna í þættinum.

,,Það var ekkert Loga að kenna að Hjörtur Logi gleymdi hvernig fótbolti virkaði þegar boltinn kemur þarna ‘diagonalt’ yfir hann og Jason Daði skorar á móti honum. Það er ekki Loga að kenna að Guðmann sé alltaf kominn eitthvað upp á miðju og Gummi Kristjáns lætur snúa sig inn og út í teignum skipti eftir skipti.“

Ólafur Jóhannesson er tekinn við þjálfun FH. Ólafur stýrði síðast Stjörnunni í fyrra, ásamt Rúnari Páli Sigmundssyni. Þar áður vann hann fjölda titla sem þjálfari Vals.

,,Auðvitað bera leikmennirnir rosalega miklar ábyrgð. Það eru þeir sem standa inni á fletinum en eftir höfðinu dansa limirnir og allt það. Hingað til hafa limirnir hans Óla bara dansað alla leið að Íslandsmeistaratitlum eða bikarmeistaratitlum ár eftir ár,“ sagði Tómas Þór um ráðninguna.