Anthony Martial og Donny van de Beek gætu verið á leiðinni frá Manchester United í sumar. Nokkur félög eru sögð hafa áhuga á þessum leikmönnum og Manchester United hefur nú þegar fengið nokkrar fyrirspurnir.

ESPN segir að Ole Gunnar Solskjaer búist við því að halda sem flestum leikmönnum hjá liðinu en til þess að fjármagna kaupin á Jadon Sancho þá gæti þurft að losa einhverja leikmenn.

Van De Beek hefur átt erfitt tímabil hjá United eftir að hann kom þangað síðasta sumar frá Ajax. Hann byrjaði aðeins fjóra deildarleiki í ensku úrvalsdeildinni á tímabilinu. Hann er nú í sumarfríi eftir að meiðsli enduðu EM-drauma kappans með Hollandi.

Martial hefur ekki spilað síðan í mars og er fyrir aftan Edinson Cavani í röðinni hjá United. Martial skoraði aðeins sjö mörk og gaf níu stoðsendingar á tímabilinu.

Andreas Pereira og Diogo Dalot eru líka á leið frá félaginu. Þeir voru báðir á láni hjá ítölskum félögum á síðasta tímabili og hefur Solskjaer lítinn áhuga á að nota þá. Klúbburinn er þó ennþá óákveðinn með hvað á að gera með Jesse Lingard sem var frábær hjá West Ham á láni á síðasta tímabili.