Margir aðdáendur Manchester United velta því fyrir sér afhverju Pogba spilar alltaf frábærlega fyrir franska landsliðið en týnist í leikjum hjá Manchester United. Pogba hefur átt misjafna tíma hjá United, hann hefur átt frábæra leiki inn á milli en nær oft að pirra stuðningsmenn í öðrum leikjum. Þegar hann spilar fyrir Frakkland á hann nánast alltaf stórleik.
„Það er enginn vafi á því að hann er hæfileikaríkur, en ég vil fá meira frá honum, sérstaklega þegar hann spilar fyrir Manchester United,“ sagði Roy Keane.
„Það er munur á Pogba sem spilar með franska landsliðinu og þeim sem spilar með United.“
„Þegar hann er með United, þá tekur hann ekki ábyrgð, kannski er of mikil ábyrgð eða það er ekki nóg af leikmönnum í kringum hann sem geta tekið ábyrgð.“
Franska landsliðið hefur úr ótrúlegum leikmönnum að moða og geta flestir verið sammála um að hann spili með betri leikmönnum þar en hjá United. Hjá Frökkum spilar hann með Kante sem er ótrúlega duglegur leikmaður. Þeir hafa spilað 30 sinnum saman á miðjunni og aldrei tapað leik.
Hjá United spilar Bruno það hlutverk sem Pogba vill helst spila og þá getur hann ekki sleppt því að sinna varnarskyldum sínum. Þá verður hann einnig að treysta á Fred, Matic eða Scott McTominay á miðjunni.
