Florentino Perez, forseti Real Madrid, neitar enn að gefast upp í baráttu sinni um að koma evrópsku Ofurdeildinni á laggirnar.

Ofurdeildin var kynnt til leiks í vor. Þar ætluðu tólf evrópsk stórlið að halda úti lokaðri keppni þar sem aðeins þeir stærstu fengju að vera með. Hugmyndin varð þó fljótt að engu eftir kröftug mótmæli. Ensku liðin Arsenal, Chelsea, Liverpool, Manchester City, Manchester United og Tottenham voru fyrst til þess að draga sig út úr áætlunum. Í kjölfarið fylgdu AC Milan, Atletico Madrid og Inter. Barcelona, Juventus og Real Madrid eru einu liðin sem hafa ekki formlega dregið sig úr Ofurdeildinni.

UEFA hefur sektað þau lið sem hafa slitið sig frá Ofurdeildinni. Þá hefur það einnig hótað því að meina Barcelona, Juventus og Real Madrid um þátttöku í Meistaradeild Evrópu á næstu leiktíð.

Perez segir þó að það muni ekki gerast og að þau lið hafi ,,unnið.“ ,,Við erum róleg vegna þess sem við höfum og vegna þess að við unnum.“ 

,,Ensku liðin voru þvinguð. Þau skrifuðu undir eitthvað sem þau áttu ekki að skrifa undir. UEFA vildi refsa þeim en dómsalir segja nei,“ sagði Perez einnig.

Forsetinn hélt áfram og sagði að ekkert lið gæti í raun og veru yfirgefið Ofurdeildina.

,,Samningurinn er bindandi og enginn getur farið. Ofurdeildin heldur áfram. Við fórum til dómara sem sagði að deildinni verði ekki haggað.“