Öll umfjöllun sem Cristiano Ronaldo telur vera neikvæða í sinn garð notar hann sem bensín í að gera betur. Frá þessu segir Rio Ferdinand fyrrum samherji hans.

Ferdinand var á BBC að greina leik Portúgals og Frakklands þar sem Ronaldo skoraði tvö í 2-2 jafntefli. Ronaldo og Lionel Messi hafa verið í sérflokki í mörg ár en Gary Lineker stjórnandi á BBC er meiri aðdándi Messi. Það hefur pirrað Ronaldo en hann notar það sem bensín.

„Hann er frábær fyrirmynd fyrir unga leikmenn, notið neikvæða umfjöllun sem bensín. Lineker hefur sem dæmi talað um að hann myndi frekar velja Messi í sitt lið,“ sagði Ferdinand.

„Hann sendi mér skilaboð og sagði ´Ég trúi ekki að hann hafi sagt þetta, ég trúi ekki að hann hafi gert þetta´. Hann notar allt sem bensín.“

„Hann hefur náð svo miklum árangri, maður veltir því alveg fyrir sér af hverju hann pælir svona mikið í öllu. Þetta er bara samkeppni fyrir honum, hann vill vera bestur.“