Knattspyrnuþjálfarinn Ólafur Kristjánsson viðurkennir að það hafi verið vonbrigði að Andra Rúnari Bjarnasyni hafi ekki tekist að koma sér nægilega vel í gang á tíma Ólafs sem þjálfari framherjans hjá Esbjerg. Ólafur var gestur í sjónvarpsþættinum 433.is á Hringbraut í vikunni.

Ólafur fékk Andra til B-deildarliðsins fyrir síðustu leiktíð frá Kaiserslautern í Þýskalandi. Andri náði aðeins að leika fimm leiki á leiktíðinni og glímdi einnig við meiðsli.

,,Já, það voru það. Hann kemur til okkar frá Þýskalandi, búinn að eiga erfiðan tíma þar, var með smá meiðsli sem hann dró eftir sér þaðan. Það var svolítið erfitt fyrir hann að koma inn,“ sagði Ólafur er hann var spurður út í það hvort að það hafi verið vonbrigði að hafa ekki náð Andra af stað.

Ólafur, sem var látinn fara frá Esbjerg í vor, segir að Andri þurfi að komast yfir meiðslin og þá geti hann staðið sig vel á vellinum.

,,Hann reyndi, hann vildi virkilega og því miður náði hann sér ekki á strik. En Andri er mjög frambærilegur leikmaður. Hann þarf bara að komast yfir þessi meiðsli og ná sér almennilega í stand og þá getur hann alveg skorað og spilað mjög vel.“

Líklegt þykir að Andri Rúnar yfirgefi Esbjerg í sumar. Hann hefur verið orðaður við heimkomu til Íslands.

Hér fyrir neðan má sjá umræðuna um Andra sem og ítarlegt viðtal við Ólaf í heild sinni. Þar er farið yfir víðan völl.