Jose Mourinho ræddi enska landsliðið við talkSPORT eftir leik liðsins við Skotland í gær. Hann var ekki hrifinn af frammistöðu liðsins.

Leikur liðanna í gær endaði með markalausu jafntefli. Sóknarleikur Englendinga var bitlaus og sóttu baráttuglaðir Skotar gott stig á Wembley.

Mourinho hefði viljað sjá enska liðið taka fleiri áhættur til að reyna að sækja sigurinn í gær.

,,Ég sá þá ekki taka neina áhættu eða sýna löngun til þess að taka sénsa og reyna að vinna,“ sagði Mourinho.

Jafnframt sagði portúgalski stjórinn að Gareth Southgate, stjóri liðsins, hafi verið hræddur við að tapa leiknum.

,,Ef England hefði þurft að vinna Skotland þá held ég að (Kalvin) Phillips hefði verið tekinn af velli eftir svona klukkutíma til þess að fá meiri sköpunarmátt inn á völlinn. Hræðslan við að tapa hélt honum inni á vellinum.“

Þess má þó geta að enska liðið er í fínum málum í D-riðli Evrópumótsins. Liðið er með 4 stig, líkt og Tékkar. Króatar og skotar eru svo með eitt stig hvort.