Sergio Ramos fyrrum varnarmaður Real Madrid hefði viljað vera áfram í herbúðum félagsins en fékk ekki tækifæri til þess.
Ramos hélt fréttamannafund til að greina frá því í gær að hann væri á förum en hann er sterklega orðaður við PSG.
„Ég tók tilboði þeirra en það var ekki lengur í gildi,“ sagði Ramos á fundinum. Hann hafði reynt að fá tveggja ára samning en Real Madrid stóð fast á sínu og honum stóð aðeins til boða eins árs samningur, sem hann ætlaði að taka.
Á tilboði Real Madrid kom fram lokadagsetning sem Ramos hafði til þess að taka því, hann virtist ekki vita af því.
„Þeir létu okkur vita fyrir viku að tilboðið væri ekki lengur í gildi, ég veit ekki af hverju þessi dagsetning var.“
„Kannski misskildi ég þetta eitthvað, það hafði enginn sagt mér þetta,“ sagði Ramos sem hafði fengið boð um eins árs framlengingu.
