Stuðningsmenn Everton eru flestir verulega ósáttir með þá hugmynd félagsins um að ráða Rafa Benitez til starfa sem knattspyrnustjóra félagsins. Benitez hefur verið í viðræðum við Everton síðustu daga um að taka við Everton, sú staðreynd að Benitez var áður stjóri Liverpool fer verulega í taugarnar á stuðningsmönnum Everton. Erkifjendurnir elda oft grátt silfur saman og hefur Benitez meðal annars kallað Everton, lítið félag.
Mótmælt var all hressilega fyrir utan Goodison Park í nótt og borðar hengdir upp, á einum þeirra stendur. „Farðu til fjandans feita Kop kunta,“ og er það vísun í The Kop stúkuna á Anfield.
Stjórn Everton er ekki sögð sammála um hvort ganga eigi frá samningi við Benitez en ferill hans síðustu ár hefur ekki verið ýkja merkilegur.
Eftir vel heppnaða dvöl hjá Liverpool hefur Benitez verið á flakki og leikstíll hans oftar en ekki mikið gagnrýndur.
Everton leitar að stjóra eftir að Carlo Ancelotti sagði upp störfum til að taka við Real Madrid en margir hafa verið orðaðir við starfið hjá Gylfa og félögum.
