Sergio Ramos hefur yfirgefið Real Madrid en félagið tilkynnti þetta í gær. Í dag var blaðamannafundur fyrir Ramos þar sem hann kvaddi stuðningsmenn félagsins.
Hann var mjög hreinskilinn á blaðamannafundinum og sagðist ekki vilja yfirgefa félagið. Hann hafi samþykkt samning frá Real Madrid eftir smá umhugsun en þá hafi samningurinn verið útrunninn og ekki lengur í boði.
„Síðustu mánuði bauð Real Madrid mér 1 árs framlenginu með 10% lægri launum. Ég vildi semja í 2 ár en að lokum ákvað ég að samþykkja þeirra tilboð. Þá var samningurinn ekki lengur í boði og hafði runnið út, eitthvað sem ég vissi ekkert um,“ sagði Ramos á blaðamannafundi.
Ramos hefur ekki enn ákveðið næstu skref en útilokaði að vera á leið til Sevilla.
„Ég hef fengið nokkur símtöl frá áhugasömum klúbbum. Leitin mun hefjast núna. Sevilla er ekki möguleiki eins og staðan er núna.“
„Ég vildi aldrei yfirgefa Real Madrid, mig hefur alltaf langað að vera hérna.“
„Ég sé ykkur fljótt aftur. Fyrr eða síðar mun ég snúa til baka. Madrid verður alltaf í hjarta mínu.“
