Kristján Óli Sigurðsson, sérfræðingur í hlaðvarpsþættinum Dr. Football sagði, í þætti dagsins, að Brynjar Ingi Bjarnason væri á leið út í atvinnumennsku mjög fljótlega.
Miðvörðurinn hefur staðið sig frábærlega með KA í upphafi leiktíðar í Pepsi Max-deildinni og þá átti hann mjög flotta innkomu í íslenska A-landsliðið í síðasta landsleikjaglugga. Hann skoraði til að mynda í leik gegn Póllandi.
,,Hann er bara að fara í mennskuna. Það er bara nákvæmlega það sem er að fara að gerast. Hann er bara að fara núna. Ef hann nær tveimur leikjum í KA-treyjunni í viðbót þá er það kraftaverk,“ sagði Kristján í þættinum.
Óvissa ríkir með miðvarðastöðurnar hjá íslenska landsliðinu fyrir næstu landsleiki í haust. Kári Árnason gæti lagt skóna á hilluna eftir tímabilið í Pepsi Max-deildinni og þá er Ragnar Sigurðsson án félags. Kristján telur Brynjar gera sterkt tilkall til þess að spila landsleikina í haust.
,,Hann er búinn að vera frábær og besti leikmaður deildarinnar so far. Þetta er bara verðskuldað. Hrós til KA-manna, hvernig þeir eru búnir að þróa þennan leikmann í þennan alvöru gæa. Hann er að fara að gera tilkall í að starta við hliðina á Sverri (Inga Ingasyni) í haust ef að Kári (Árnason) er hættur.“
Ítalska félagið Lecce hefur áhuga á Brynjari Inga. Þá er einnig áhugi frá Rússlandi.
Smelltu hér til þess að hlusta á þátt Dr. Football frá því í dag.
