Shkodran Mustafi hefur verið kosinn ,,versti leikmaður tímabilsins“ í þýsku Bundesligunni af öðrum leikmönnum deildarinnar. Kicker hélt sína árlegu könnun nýverið þar sem leikmenn kjósa nafnlaust.
Mustafi kom til Schalke í byrjun febrúar eftir að samningi hans við Arsenal hafði verið rift. Honum tókst ekki að bjarga liðinu frá falli. Það skítféll með aðeins 16 stig úr 34 leikjum.
Miðvörðurinn var oft harðlega gagnrýndur er hann lék á Englandi fyrir klaufaleg mistök. Hann var reglulega skotspónn knattspyrnuaðdáenda sem gerðu mikið grín að honum.
Tíu aðrir leikmenn Schalke voru tilnefndir sem ,,versti leikmaðurinn“ en Mustafi ,,vann“ með rúmlega 13 prósent atkvæða.
Í kosningu Kicker var Robert Lewandowski valinn besti leikmaður tímabilsins. Þá var Jamal Musiala valinn nýliði tímabilsins.
