Chelsea virðist leiða kapphlaupið um norska framherjann Erling Braut Haaland þessa stundina. Félagið gæti boðið Dortmund himinnháa upphæð fyrir þjónustu leikmannsins.
Haaland hefur verið frábær fyrir Dortmund frá því hann kom til félagsins í janúar 2020 frá RB Salzburg. Það er tímaspursmál hvenær þessi tvítugi framherji mun fara í stærra félag.
Samkvæmt nokkrum erlendum miðlum ætlar Chelsea að bjóða Dortmund Tammy Abraham, enskan framherja sinn, til félagsins upp í verðið á Haaland. Hafni þýska félagið þessu boði gæti enska félagið hins vegar boðið um 150 milljónir punda í Norðmanninn. Það er talin vera upphæðin sem Dortmund vill, ætli eitthvað félag sér að sækja Haaland strax í sumar. Hins vegar er ákvæði í samningi leikmannsins sem er svo hljóðandi að lið geti keypt hann fyrir 68 milljónir punda sumarið 2022.
Þrátt fyrir að Chelsea leiði kapphlaupið um Haaland eins og er þá eru mun fleiri stórlið með auga á honum. Til að mynda félög á bæði Englandi og Spáni.
