Gareth Southgate hefur ákveðið að taka Ben White með á Evrópumótið en eitt laust pláss var í hópi enska liðsins. Ástæðan voru meiðsli sem Trent Alexander-Arnold varð fyrir í síðustu viku.
Bakvörður Liverpool tognaði aftan í læri í æfingaleik með landsliðinu og verður frá í sex vikur.
Enska landsliðið lék sinn síðasta æfingaleik fyrir mótið í gær en liðið mætir Króatíu á sunnudag.
White er miðvörður sem átti gott tímabil með Brighton en White var í upphaflega æfingahóp Southgate sem taldi 33 leikmenn.
Southgate var fremur þunnskipaður í hjarta varnarinnar og þá sérstaklega vegna meiðsla sem Harry Maguire glímir við.
