Virgil Van Dijk fer með hollenska landsliðinu á Evrópumótið í knattspyrnu en þó í öðru hlutverki en sem spilandi leikmaður.

Van Dijk hefur ekki spilað leik síðan í Október 2020 þegar hann meiddist illa á hné eftir ljóta tæklingu frá Jordan Pickford, markmanni Everton.

Holland hefur nú leitað til Van Dijk, sem hefur verið fyrirliði landsliðsins frá 2018, og mun kappinn vera með liðinu þegar það lýkur undirbúningi sínum fyrir EM og á mótinu sjálfu.

Van Dijk sást á bekknum í æfingaleik Hollendinga gegn Skotlandi í vikunni. De Boer, þjálfari Hollendinga hafði þetta að segja um Van Dijk:

„Virgil er gríðarlega mikilvægur fyrir liðið og hefur spilað stórt hlutverk í að hvetja strákana áfram síðustu ár,“ sagði De Boer á blaðamannafundi.

„Liðið elskar nærveru hans.“

Van Dijk spilaði fyrst fyrir Holland árið 2015 og hefur leikið 38 landsleiki. Hann hefur aldrei tekið þátt á stórmóti.