Manchester United er í viðræðum við Borussia Dortmund um hugsanleg félagaskipti Jadon Sancho. Allir aðilar eru nokkuð bjartsýnir á að skiptin muni ganga í gegn. Sky Sports fjallar um málið.
Man Utd reyndi að fá Sancho síðasta sumar en án árangur. Þá vildi Dortmund fá 108 milljónir punda fyrir hann. Nú er hins vegar talið að leikmaðurinn geti farið á töluvert lægri upphæð. Það er vegna kórónuveirufaraldursins og einnig vegna þess að Sancho á nú aðeins tvö ár eftir af samningi sínum við þýska liðið.
Dortmund mun þó einungis hlusta á tilboð sem eru í samræmi við þá upphæð sem það biður um. Einnig skiptir máli að Man Utd klári skiptin fyrir þá lokadagsetningu sem Dortmund setur. Það hefur þó hvorki verið gefið upp opinberlega hver verðmiðinn eða umrædd lokadagsetning er.
Ef að samningar á milli félagana nást þá er ekki talið að viðræður Man Utd við Sancho sjálfan muni verða til vandræða.
Sky Sports segir einnig frá því að nokkur önnur félög hafi áhuga á því að krækja í Sancho í sumar.
