Kristján Óli Sigurðsson, sérfræðingur í hlaðvarpsþættinum Dr. Football, er allt annað en sáttur við það að leikmenn úr Pepsi Max-deildinni séu partur af íslenska karlalandsliðinu í þeim vináttulandsleikjaglugga sem nú stendur yfir. Hann segir það hafa slæm áhrif á deildina.
Alls fóru átta leikmenn úr Pepsi Max-deildinni með landsliðinu í verkefnið. Það eru þeir Ísak Óli Ólafsson, Brynjar Ingi Bjarnason, Þórir Jóhann Helgason, Gísli Eyjólfsson, Birkir Már Sævarsson, Hörður Ingi Gunnarsson, Kári Árnason og Rúnar Þór Sigurgeirsson. Þeir fjórir síðastnefndu tóku þó aðeins þátt í fyrsta leik verkefnisins gegn Mexíkó á meðan hinir héldu áfram í leikinn gegn Færeyjum og fara svo í leikinn gegn Póllandi á þriðjudag.
Þetta þýðir það að lítið hefur verið um að vera í Pepsi Max-deildinni á sama tíma og er helmingur liðanna í tveggja vikna fríi. Þrír leikir voru spilaðir um síðustu helgi.
,,Það er bara þvæla (að leikmenn úr Pepsi Max-deildinni séu með landsliðinu i Færeyjum eins og er) og það að taka ryþmann úr mótinu svona svakalega út af einhverjum ömurlegum æfingaleik þegar við erum með nóg af atvinnumönnum í fótbolta. Bara galið. Allt í lagi þetta verkefni þarna í Ameríku, einn leikur, takk, búið. Heyrðu, fjórir leikmenn í þetta. Það eru 24 í þessum hóp,“ sagði Kristján Óli í þættinum.
,,Fyrir samherja þessara gæa sem eru í þessu verkefni. Það er ekkert grín að ýta bara á start, stopp, start, stopp. Þetta er bara kjaftæði og KSÍ þarf aðeins að fara að drullast í gang einu sinni. Ég bið ekki um oftar en einu sinni. Drullist í gang.“
