Chelsea hefur staðfest það að samningur Olivier Giroud við félagið var framlengdur í apríl. Um er að ræða ákvæði sem Chelsea gat virkt í samningi hans.
Giroud er 34 ára gamall en hann hefur verið í herbúðum Chelsea í þrjú og hálft ár, segir félagið að hann verði í ár til viðbótar.
Giroud er þó sagður hafa áhuga á að skoða aðra kosti enda hefur hann verið í aukahlutverki hjá Chelsea. Giroud lék áður með Arsenal.
Chelsea hefur einnig staðfest að Thiago Silva hafi framlengt samning sinn við félagið til eins árs, miðvörðurinn var að klára sína fyrstu leiktíð með Chelsea sem vann Meistaradeildina á dögunum.
Silva er 36 ára gamall en hann lék 34 leiki fyrir félagið á sínu fyrsta tímabili. Thomas Tuchel stjóri liðsins framlengdi samning sinn til 2024 fyrr í dag.
