Gabriel Agbonlahor er ósáttur við Jordan Henderson, fyrirliða Liverpool, og ákvörðun Gareth Southgate um að velja hann í hópinn þrátt fyrir meiðsli sem hafa plagað kappann í töluverðan tíma.

Henderson hefur ekki spilað leik síðan í febrúar eftir að hafa hlotið nárameiðsli í leik gegn Everton á Anfield. Henderson var ónotaður varamaður í vináttulandsleik Englands og Austurríkis í gærkvöldi og enn er óvíst hvort hann verði klár fyrir fyrsta leik Englendinga á EM sem fer fram 13. júní.

“Þetta Henderson mál truflar mig verulega,” sagði Agbonlahor á talkSPORT.

“Hann ætti bara að vera hreinskilinn við stjórann og segja honum frá því sem hann er að ganga í gegnum. Fáið inn Ben White, Eric Dier eða einhvern sem getur leyst þessa stöðu ef hann nær sér ekki.”

„Mér finnst hann vera sjálfselskur. Hópurinn var tilkynntur á mánudag og hann segir Southgate degi seinna að hann geti ekki spilað. Mótið hefst eftir 10 daga og þeir spila gegn Króatíu sem er gott lið. Leikmenn þurfa að vera í leikformi.“

„Þetta er ekki Lionel Messi, sendið hann heim. Við höfum aðra miðjumenn sem myndu standa sig alveg jafn vel og hann.“

Þetta eru ekki einu meiðslin sem læknateymi enska landsliðsins glímir við þessa stundina en Trent Alexander-Arnold haltraði út af í vináttulandsleiknum gegn Austurríki í gærkvöldi og nú hefur verið staðfest að hann verður ekki með á EM. Þá er Maguire enn tæpur.