Harry Kane mun líta á það sem klúður ef hann klárar landsliðsferilinn án titils. Harry Kane fer með enska landsliðinu á EM í sumar sem hefst 11. júní. Frakkar eru taldir líklegastir til sigurs enda núverandi heimsmeistarar en Englendingar eru næstir í spám veðbanka.

England vann síðast titil á heimsmeistaramótinu 1966 og eru því liðin 55 ár frá síðasta titli enska landsliðsins. Kane telur að hæfileikarnir í liðinu séu til staðar í þetta skiptið.

“Faðir minn er fæddur 1964 og móðir mín 1966, svo þið sjáið hvað það er langt síðan. Það er undir okkur komið að bæta úr þessu,” sagði Harry Kane í viðtali við Evening Standard.

“Ég held að ef ég klári atvinnumannaferil minn án þess að vinna titil fyrir England þá muni ég líta á það sem algjört klúður.”

“Liðið er enn að þróast og það er nægt rými til bætingar en þetta er markmiðið og ég tel okkur geta staðið við það. Það eru miklar væntingar gerðar til okkar en ég tel að leikmennirnir séu tilbúnir í hvað sem er.”