Lotar Matthaus, goðsögn Bayern Munchen, segir að Pep Guardiola, stjóri Manchester City, hafi stolið Meistaradeildartitlinum af stuðningsmönnum félagsins. Það er vegna leikskipulagsins í úrslitaleik keppninnar.
Man City tapaði gegn Chelsea í úrslitaleik Meistaradeildarinnar síðastliðinn laugardag, 1-0. Kai Havertz skoraði eina mark leiksins í lok fyrri hálfleiks. Guardiola hefur verið gagnrýndur töluvert fyrir liðsuppstillingu sína í leiknum. Hann geymdi bæði Rodri og Fernandinho á bekknum og spilaði ekki með neinn varnarsinnaðan miðjumann.
,,Með þessari liðsuppstillingu stal hann Meistaradeildildinni af félaginu og stuðningsmönnum. Hann verður að hlusta vel á hans hörðustu gagnrýnendur úr öllum áttum,“ sagði Matthaus.
Þessi fyrrum leikmaður Bayern, Inter og fleiri liða telur að leikmenn Man City gætu átt erfitt með að treysta Guardiola eftir tapið.
,,Ég er viss um að það verði í umræðunni að losa sig við hann. Leikmenn munu efast um hann eftir úrslitaleikinn. Hann þurfti bara að prófa eitthvað aftur, reyna að vera frumlegur á versta mögulega augnablikinu. Hann átti skilið að tapa.“
Matthaus gagnrýndi spænska stjórann einnig fyrir að hafa ekki spilað með hreinræktaðan framherja í leiknum. Sergio Aguero og Gabriel Jesus byrjuðu til að mynda báðir á bekknum.
,,Af hverju skildi hann Rodri og/eða Fernandinho eftir utan byrjunarliðs, byrjaði með sex sóknarsinnaða leikmenn en ekki með neinn framherja.“
