Það kom Kjartani Henry Finnbogasyni ekki á óvart að Ólafur Kristjánsson hafi verið látinn fara frá Esbjerg í vor. Hann segir að nýjir eigendur liðsins ætli sér að breyta miklu hjá félaginu. Kjartan var til viðtals í sjónvarpsþættinum 433.is á Hringbraut í gær.

Kjartan lék undir stjórn Ólafs hjá Esbjerg í dönsku B-deildinni seinni hluta tímabilsins sem nú er nýlokið. Hann talar virkilega vel um þjálfarann.

,,(Hann er) ‘professional’ og kann sitt fag. Hann á klárlega heima í svona flottu, ‘professinal’ umhverfi þar sem honum líður vel. Það komu nýjir eigendur inn, einhver amerísk keðja sem ætlar að fara að umturna öllu. Svona er þetta stundum,“ sagði Kjartan er hann var spurður út í það hvernig það væri að leika undir stjórn Ólafs. Þarna vísaði hann einnig í nýja bandaríska eigendur liðsins sem eiga meðal annars Barnsley á Englandi og KV Oostende í Belgíu.

Kjartan segir ekki mikið hafa velt sér upp úr brottrekstri Ólafs. Tíðindin komu honum þó ekki í opna skjöldu miðað við það sem hann hafði séð af  bandarísku eigendunum áður.

,,Ég var svosem ekkert að pæla í því. Ég var meira að hugsa um mig og liðið. Nei, ef maður horfir á það þá held ég að þeir hafi gert þetta hjá öllum klúbbum. Þeir eiga klúbb í Belgíu og Englandi og fá sinn mann inn og eru með eitthvað ‘concept’ þannig ég skipti mér ekki af því.“ 

Hægt er að nálgast nánari útgáfu af viðtalinu með því að smella hér. Svo er einnig hægt að horfa á það hér fyrir neðan.