Uppboð á Liverpooltreyju sem Xabi Alonso áritaði lauk í gær. Hæsta boð var 270 þúsund krónur og rennur sú fjárhæð til Umhyggju, félags langveikra barna. Liverpool klúbburinn á Íslandi stóð fyrir uppboðinu.

Uppboðið hófst 23. maí og þá þegar fóru að berast boð í gripinn. Upphæðin hækkaði svo jafnt og þétt og um hádegisbil í gær barst svo hæsta boðið, 270 þúsund krónur.

Uppboðið var haldið til minningar um Kamillu Eir Styrmisdóttur sem lést 6. maí síðastliðinn tæplega sex mánaða gömul. Hún barðist bæði við hjartabilun og efnaskiptasjúkdóminn MMA. Umhyggja veitti fjölskyldu Kamillu mikinn stuðning bæði meðan á umönnun Kamillu stóð, sem og í kjölfar andláts hennar.

„Liverpoolklúbburinn á Íslandi er afar ánægður með hvernig til tókst og þakkar öllum þeim sem tóku þátt í uppboðinu. Afhending á treyju og fjárhæð fer fram á næstu dögum,“ segir á vef klúbbsins.