Staðan á íslenska landsliðinu var til umræðu í útvarpsþættinum Fótbolta.net á laugardag. Rafn Markús Vilbergsson sérfræðingur þáttarins hefur áhyggjur af stöðu mála.

Rafn Markús hefur áhyggjur eins og margir aðrir af því að bestu leikmenn liðsins gefi ekki kost á sér í núverandi verkefni. Arnar Þór Viðarsson hefur ekki farið í felur með vonbrigði sín að fá ekki bestu mennina í verkefnið.

Ísland lék gegn Mexíkó á laugardagskvöld þar sem liðið tapaði 2-1 en liðið leikur svo gegn Færeyjum og Póllandi.

„Þetta er eins og við séum komin 10-15 ár aftur í tímann. Maður er hræddur um þetta miðað við allan uppganginn síðustu ár, þetta er skringileg staða sem er komin upp. Þetta er einhvern veginn ekki staðan sem var þegar Heimir eða Lars voru með þetta. Maður hefur áhyggjur af því að þetta sé ekki það sama, að menn vilji koma og spila fyrir landsliðið. Hver sem ástæðan er, það er greinilega ekki eins spennandi að koma og spila fyrir landsliðið í dag eins og fyrir nokkrum árum síðan,“ sagði Rafn Markús í útvarpsþætti Fótbolta.net.

Rafn Markús veltir því upp hvað sé að baki, venjan hafi verið síðustu ár að bestu leikmenn liðsins mæti í öll verkefni.

„Hver er ástæðan fyrir þessu og af hverju er þessi breyting á örfáum árum? Er það ráðningin á nýjum þjálfurum, er það vandamálið? Er eitthvað hjá KSÍ? Hver er ástæðan fyrir þessum breytingum? Það vildu allir spila með landsliðinu fyrir nokkrum mánuðum síðan,“ sagði Rafn.