Chelsea er Evrópumeistari eftir sigur á Manchester City í úrslitaleik Meistaradeildarinnar í kvöld.
Raheem Sterling fékk fyrsta færi leiksins á 8. mínútu þegar Ederson átti langa sendingu inn fyrir vörn Chelsea en Reece James tókst að verjast honum. Stuttu síðar átti Mason Mount fyrirgjöf á Timo Werner hinum megin en sá síðarnefndi hitti ekki boltann úr fínu færi. Werner fékk aftur gott færi nokkrum mínútum síðar en skaut beint á Ederson í markinu.
Leikurinn róaðist aðeins eftir þetta. Um miðjan fyrri háfleikinn slapp Phil Foden þó í gegn en Antonio Rudiger gerði frábærlega í að koma sér fyrir hann.
Á 42. mínútu skoraði Kai Havertz fyrir Chelsea. Hann fékk þá frábæra sendingu inn fyrir vörn City frá Mason Mount, náði mikilvægri snertingu á boltann til þess að komast framhjá Ederson og skoraði í autt markið. 1-0 var staðan í hálfleik.
Seinni hálfleikur var fremur rólegur. Um hann miðjan átti Riyad Mahrez sendingu fyrir mark Chelsea, Gabriel Jesus virtist einungis eiga eftir að pota boltanum í markið en á ögurstundu kom Cesar Azpilicueta.
Stuttu síðar fékk Christian Pulisic dauðafæri til að fara langt með leikinn fyrir Chelsea. Þá var hann nýkominn inn á sem varamaður. Hann fékk stungusendingu frá Havertz en skaut framhjá úr mjög álitlegu færi.
Besta færi City til að jafna kom á 90. mínútu þegar Ruben Dias sendi boltann fyrir markið en enginn leikmaður þeirra náði að pota boltanum inn af stuttu færi. Mahrez átti svo eftir að eiga skot rétt yfir markið með skoti af vítateigslínunni.
Chelsea hélt út. Lokatölur 1-0. Chelsea er Evrópumeistari!
