Tveir leikir fóru fram í þriðju umferð 2. deildar kvenna í dag. Völsungur vann stórsigur á KM og Sindri vann SR á útivelli.
Frederica Silvera Arias kom Sindra yfir snemma leiks. Samira Suleman tvöfaldaði forystu þeirra um miðjan fyrri hálfleikinn. Frederica skoraði svo tvö mörk á fyrsta stundarfjórðungi seinni hálfleiks. Þar með var hún komin með þrennu. Tara Sveinsdóttir minnkaði muninn fyrir SR eftir rúman klukkutíma leik. Regielly Halldórsdóttir skoraði svo fimmta mark Sindra seint í leiknum áður en Sierra Marie Lelii klóraði í bakkann fyrir SR. Lokatölur 2-5.
Völsungur vann KM svo hvorki meira né minna en 11-0 á útivelli. Kristín Eik Harðardóttir gerði sér lítið fyrir og skoraði fimm mörk. Elfa Mjöll Jónsdóttir skoraði tvö mörk. Marta Sóley Sigmarsdóttir, Sarah Catherine Elnicky og Samara De Freitas Martins Lino gerðu svo eitt mark hvor. Eitt markanna var svo sjálfsmark hjá Helgu Bjarney Bjarnadóttur, leikmanni KM.
Völsungur er á toppi deildarinnar með fullt hús stiga eftir þrjá leiki og Sindri í því sjötta með 3 stig eftir tvo leiki. SR og KM eru svo bæði án stiga eftir þrjá leiki.
