Það er komin alvöru pressa á UEFA að hætta við breytingar á Meistaradeildinni sem þeir tilkynntu í apríl. Sú tilkynning fór algjörlega í skuggann af Ofurdeildinni frægu sem hætt var við aðeins nokkrum dögum seinna.
Meðal þeirra breytinga sem eiga að verða á Meistaradeildinni eru að fleiri leikir verða spilaðir og einnig á að tryggja það að „stóru klúbbarnir“ í Evrópu geti komist í keppnina án þess að hafa tryggt sér réttinn til þess úr deildarkeppni.
Forseti LaLiga, Javier Tebas, er í stjórn samtakanna sem munu koma til með að endurskoða þessa ákvörðun UEFA og segist hann sannfærður um það að fallið verði frá þessari ákvörðun, samkvæmt Marca.
Þá sagði formaður Crystal Palace, Steve Parish, á fundi í Madríd í vikunni að það væru breytingar á leiðinni.
UEFA tilkynnti að frá 2024 myndi fjöldi liða aukast úr 32 í 36, og af þessum fjórum aukasætum færi helmingur til „stóru liðanna“ sem hefðu ekki tryggt sér rétt á að spila í Meistaradeildarsæti úr deildarkeppni. Í frétt Daily Mail segir að þetta svipi til þess sem Ofurdeildin fræga ætlaði að gera og verða fótboltaaðdáendur um heim allan ósáttir ef ekki verður hætt við þessa breytingu á Meistaradeildinni.
