Ole Gunnar Solskjær stjóri Manchester United er allt annað en sáttur með forráðamenn ensku úrvalsdeildarinnar sem hafa sett þrjá leiki á leikmenn United frá sunnudegi til fimmtudag.

United lék gegn Roma í Evrópudeildinni í gær og mætir svo Aston Villa á sunnudag, á þriðjudag á liðið erfiðan leik gegn Leicester og á fimmtudag mætir liðið Liverpool.

Leikurinn gegn Liverpool átti að fara fram síðasta sunnudag en kröftug mótmæli á Old Trafford urðu til þess að lögreglan tók fyrir það að leikurinn færi fram.

„Ég hef aldrei séð þetta áður, þetta er sett upp af fólki sem hefur aldrei spilað fótbolta á þessu getustigi,“ sagði Solskjær ósáttur.

„Þetta er líkamlega ómögulegt fyrir leikmennina okkar, við fáum ekki góð spil í hendurnar. Við þurfum allan hópinn í þessa leiki, það er stuttur tími til að undirbúa leikina.“