Sebastian Kehl, yfirmaður knattspyrnumála hjá Borussia Dortmund, segir ekkert til í þeim orðrómum að Erling Braut Haaland, framherji liðsins, sé á förum frá félaginu.

Haaland, hefur verið orðaður við stærstu félög Evrópu að undanförnu en Kehl, er staðráðinn í þeirri trú sinni að Haaland fari ekki fet.

„Það er minn skilningur að Haaland muni spila fyrir Dortmund á næsta tímabili. Haaland er sammála því, ég sé hann á hverjum einasta degi og get sagt að honum líður vel hér,“ sagði Kehl í viðtali hjá Sport1.

Haaland hefur staðið sig frábærlega með Dortmund eftir að hann gekk til liðs við liðið frá Red Bull Salzburg. Hann hefur spilað 56 leiki með þýska félaginu, skorað 53 mörk og gefið 14 stoðsendingar.

Haaland var árið 2020 valinn besti ungi leikmaður Evrópu. Lið á borð við Real Madrid, Barcelona, Manchester United og Manchester City hafa öll verið orðuð við kaup á leikmanninum.