Stjarnan og Leiknir gerðu markalaust jafntefli á Samsung-vellinum í Garðabæ í fyrstu umferð Pepsi Max-deildarinnar í kvöld.

Stjarnan hafði yfirhöndina á vellinum en tókst ekki að búa til nægilega góð marktækifæri. Leiknismenn vörðust þeim vel og Guy Smit  varði vel.

Heimamenn komu boltanum að vísu í netið í seinni hálfleik en markið var dæmt af þar sem boltinn hafði farið í hönd Hilmars Árna Halldórssonar í aðdragandanum.

Einar Karl Ingvarsson, nýr leikmaður Stjörnunnar, fékk rautt spjald í lok leiks þegar hann braut á Sólon Breka Leifssyni þegar sá síðarnefndi var sloppinn í gegn. Einar missti boltann klaufalega frá sér í aðdragandanum.

Sævar Atli Magnússon hefði getað stolið sigrinum fyrir Leikni í uppbótartíma þegar hann slapp einn í gegn. Skot hans fór hins vegar beint á Harald Björnsson í marki Stjörnunnar. Sá síðarnefndi gerði vel í að koma út á móti Sævari.

Ekkert mark skorað í Garðabæ í dag og stigunum deilt á milli liðanna.