Jóhannes Karl Guðjónsson, þjálfari ÍA, var í viðtali við Stöð 2 Sport eftir 2-0 tap gegn Val í gær. Hann ræddi þar um góðan fyrri hálfleik sinna manna en einnig dómaraákvarðanir sem hann taldi hafa fallið með Val.

,,Mér fannst dómarinn svolítið aðstoða Valsmennina og sýna þeim full mikla virðingu í spjaldagjöfinni,“ sagði Jóhannes eftir leik.

Skagamenn áttu góðan fyrri hálfleik í gær, pressuðu vel á Valsmenn og gáfu þeim lítið pláss. Valur setti þó í annan gír í seinni hálfleik og kláraði leikinn. Ekki hjálpaði það ÍA að missa Ísak Snæ Þorvaldsson af velli með tvö gul spjöld. Nánar má lesa um leikinn hér. 

,,Mér fannst dómari leiksins dæma leikinn vel og hef ekkert út á þá að setja sem tríó en mér fannst fyrsta gula spjaldið sem Ísak Snær fékk, hann kemur ekki við Patrick Pedersen og hann hendir sér upp, leggst í jörðina og vælir út gult spjald. Haukur Páll gerir svipað, hendir sér eitthvað og liggur eftir. Mér fannst Birkir Már eiga að fá gult spjald þegar hann hjólar í Árna þegar við erum að reyna að komast í hraða sókn. Eftir að við missum Ísak út af var þetta virkilega erfitt,“ sagði Jóhannes.