Everton tók á móti Aston Villa í lokaleik dagsins í ensku úrvalsdeildinni. Villa vann að lokum góðan útisigur í fjörugum leik.
Aston Villa var heilt yfir betri aðilinn í dag og olli vörn Everton miklum vandræðum.
Ollie Watkins kom gestunum yfir á 13.mínútu eftir mistök frá Mason Holgate. Hann vann boltann af varnarmanninum og skoraði framhjá Jordan Pickford.
Dominic Calvert-Lewin jafnaði fyrir Everton stuttu síðar. Það gerði hann með skalla eftir hornspyrnu sem tekin var af Lucas Digne.
Anwar El-Ghazi skoraði sigurmark leiksins fyrir Aston Villa. Hann skoraði með fallegu skoti fyrir utan teig. Lokatölur 1-2.
Gylfi Þór Sigurðsson var á sínum stað í byrjunarliði Everton í kvöld og spilaði rúmar 80 mínútur.
Everton er í áttunda sæti með 52 stig, 2 stigum frá Evrópudeildarsæti. Villa er sæti neðar með 48 stig.
