Real Madrid tók á móti Chelsea í fyrri leik liðanna í undanúrslitum Meistaradeildar Evrópu í kvöld og endaði leikurinn með 1-1 jafntefli. Chelsea spilaði frábærlega í fyrri hálfleik en nýtti færin ekki nægilega vel. Tuchel var nokkuð ánægður með sína menn eftir leik:
„Við byrjuðum leikinn frábærlega með miklum gæðum og hugrekki. Við áttum skilið að vinna fyrri hálfleikinn þar sem við áttum mikið af góðum færum. Því miður skoruðu þeir úr föstu leikatriði en þeir fengu engin önnur tækifæri. Við leyfðum þeim ekkert að gera,“ sagði Thomas Tuchel í viðtali við BT Sport eftir leik.
„Ég var mjög vonsvikinn með stöðuna í hálfleik. Við urðum að vera rólegir og passa að missa ekki sjálfstraustið. Seinni hálfleikur var mjög taktískur og maður sá að við vorum þreyttir. Við höfðum aðeins nokkra daga til að jafna okkur eftir erfiðan útileik. Við verðum að lifa við stöðuna 1-1.“
„Við áttum skilið að skora þetta mark og hefðum átt að skora eitt mark í viðbót að minnsta kosti. Við fengum á okkur mark upp úr engu og það getur alltaf gerst þegar við spilum á móti leikmönnum með svona einstaklingsgæði.“
